ಸಿಂದಗಿ: ಉಪಚುನಾವಣೆ ವೇಳೆ ನನ್ನ ವಿಜಯ ಸಂಕಲ್ಪಕ್ಕೆ ಶ್ರೀದೇವಿ ಆಶೀರ್ವಾದ ಸಿಕ್ಕಿತು ಎಂದು ಶಾಸಕ ರಮೇಶ ಭೂಸನೂರ ಹೇಳಿದರು.
ಪಟ್ಟಣದ ಜೈಹನುಮಾನ ಚೌಕ್‌ನಲ್ಲಿ ಶನಿವಾರ ನೂತನ ದೇವಸ್ಥಾನದ ಭೂಮಿಪೂಜಾ ಸಮಾರಂಭವನ್ನು ನೆರವೇರಿಸಿ ಮಾತನಾಡಿದರು.
ಇಲ್ಲಿನ ಹಿರಿಯರ ಒತ್ತಾಯಕ್ಕೆ ಮಣಿದು ದೇವಸ್ಥಾನದ ಬೇಡಿಕೆಗೆ ಸ್ಪಂದಿಸಿ, ಚುನಾವಣೆಯಲ್ಲಿ ಗೆಲುವು ಸಾದಿಸಿದ ತಕ್ಷಣವೇ ಈ ದೇವಸ್ಥಾನಕ್ಕೆ ಮುಜರಾಯಿ ಇಲಾಖೆಯಿಂದ ರೂ.10 ಲಕ್ಷ ಅನುದಾನವನ್ನು ಒದಗಿಸುವ ಮೊದಲ ಕೆಲಸ ಮಾಡಿದೆ. ಈ ಅನುದಾನವನ್ನು ಸದ್ಬಳಕೆ ಮೂಲಕ ದೇವಸ್ಥಾನದ ನಿರ್ಮಾಣ ಆರಂಭಿಸಬೇಕು ಎಂದರು. ಈ ಭಾಗದಲ್ಲಿನ ತಳವಾರ ಸಮುದಾಯದ ಎಸ್ಟಿ ಮಾನ್ಯತೆ, ದಿ.ವಿಠ್ಠಲ ಹೆರೂರ ಅವರ ಹೋರಾಟದ ಪಲದಿಂದ ರಾಜ್ಯ ಸರ್ಕಾರ ಎಸ್ಟಿ ಪ್ರಮಾಣಪತ್ರ ನೀಡಲು ಆದೇಶಿಸಿದೆ. ಭವಿಷ್ಯದಲ್ಲಿ ಈ ಮೀಸಲಾತಿ ನಿಮ್ಮ ಮಕ್ಕಳ ಭವಿಷ್ಯ ರೂಪಿಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತದೆ ಎಂದು ಹೇಳಿದರು.
ಪುರಸಭೆ ಅಧ್ಯಕ್ಷ ಡಾ.ಶಾಂತವೀರ ಮನಗೂಳಿ ಮಾತನಾಡಿ, ದೇವಸ್ಥಾನದ ಮುಂದಿನ ಅಭಿವೃದ್ಧಿಯ ಯಾವುದೇ ಕೆಲಸವಿದ್ದರೂ ಅದನ್ನು ಪೂರೈಸಿಕೊಡುವುದಾಗಿ ಭರವಸೆ ನೀಡಿದರು.
ಡಾ.ಪ್ರಭುಸಾರಂಗದೇವ ಶಿವಾಚಾರ್ಯರು ಸಾನಿಧ್ಯ ವಹಿಸಿದ್ದರು. ಈ ವೇಳೆ ನೂತನ ಕಟ್ಟಡದ ಸ್ಥಳ ಶುದ್ಧೀಕರಣದ ಹೋಮ, ಹವನದ ಕಾರ್ಯಕ್ರಮ ನಡೆಯಿತು.
ಹಿರಿಯ ಶಿವರಾಯ ಕುರಿ ಮಾಜಿ ಪುರಸಭೆ ಅಧ್ಯಕ್ಷ ಸುಶಾಂತ ಪೂಜಾರಿ, ಈರಣ್ಣ ರಾವೂರ, ಗುರು ತಳವಾರ, ಪುರಸಭೆ ಸದಸ್ಯರಾದ ಬಸವರಾಜ ಯರನಾಳ, ಹಣಮಂತ ಸುಣಗಾರ, ಶ್ರೀಶೈಲ ಬೀರಗೊಂಡ ಸೇರಿದಂತೆ ಅನೀಲಗೌಡ ಬಿರಾದಾರ ಮತ್ತಿತರರಿದ್ದರು.
